ГАБАНТЫ ХАРДЗÆЙ

Искæй фæллойæ (минас кæнын, хардз кæнын).

Кæрчытæ, рог машинæ, балтæн сæ дзæбæхтæ, арахъхъæн йæ двайно... суанг ма настæ дæр рахастой, се 'ппæт дæр Габанты хардзæй. (Цæгæраты М. Нæ фехъуыстон ма зæгъ.)

Бирæ... цирчъыты мæ фæзилын кодта Томас... Бирæ доллартæ ма нысхуыста Габанты хардзæй йæ дзыппы. (Хъайтыхъты А. Фыййауы лæдзæг.)

Октябры революцийы агъоммæ Ирон фæсивæдæй бирæ цыд Бакумæ нефты куыст кæнынмæ. Ам хорз цардыл фæхæст сты Габанты æфсымæртæ. Уыд сын сæхи хæрæндон. Куыстмæ чи цыд, уыдонæй алчи куыстыл нæ хæст кодта æмæ сын Габанты æфсымæртæ хæрд лæвæрдтой лæвар сæ хæрæндоны. Сæ фаг-иу куы бахордтой, уæд-иу кæрæдзийæн дзырдтой: «Кæрдзын бахордтам Габанты хардзæй».